Nixus

Då er alt klart til European Respiratory Society sin kongress i München. Vert fyrste gong eg skal presentere forskinga mi, så eg er ganske spent. På biletet kan de sjå posteren vi har laga (kan lastast ned i pdf-format her).

Vi reiser av garde fredag morgon og kjem tilbake onsdag i neste veke. Laurdag skal eg på kurs, sundag skal eg stå og presentere resultata våre, og resten av dagane vert det å tusle rundt og få med meg mest mogeleg av lungeforskinga som pågår rundt omkring. Håpar eg får tid til å sjå meg litt rundt i München og kringliggjande områder. Har aldri vore der tidlegare, men har høyrt det er fint der.

Var ferdig med sommarjobben min på fredag, men det vert ikkje ferie heilt enno. Det fyrste eg gjorde, var å stikke innom European Underwater and Baromedical Society sin årlege kongress som var i Bergen i helga. Og neste helg skal eg på European Respiratory Society sin kongress i München, og skal for fyrste gong presentere forskingsdata for andre enn dei eg jobbar med. Vert spanande! Og så har eg ein artikkel å skrive. Skal prøve å få ei veke med ferie i varmare strok i løpet av september.

Det eg hadde tenkt skulle vere ei roleg helg i Øygarden, vart til litt over 100km padling rundt Sotra. Det vil seie: Då eg kom til naustet og GPSen viste 99,6km, klarte eg ikkje dy meg for å ta ein æresrunde rundt Måseskjæret. Var temmeleg sliten på slutten, men timane eg fekk i dønningane laurdagen og sundags morgon gjorde at det var meir enn verdt det! Og så fekk eg testa ut det nye teltet mitt. Er veldig nøgd, spesielt var eg imponert over ventilasjonen. Med primusen på, tørka kleda fort som berre det.

Har ikkje fått importert GPS-loggen enno, men det kjem. Bileta har eg lagt ut i albumet mitt.

Det har vorte ein del varmare sidan eg starta ute på havet i dag tidleg. Har gått i land ved Flesland for å skifte frå padlejakke til rashguard og ete. Padlar igjen med ein gong.

Helgas siste etappe går nordover gjennom Vatlestraumen, som er eit mareritt å padle motstraums. For å ha straumen på mi side, startar eg difor tidleg. Har pakka alt, og skal berre ha meg ein pakke Drytech storfegryte før eg set i gang.

Då eg nesten var kome fram dit eg hadde tenkt meg i dag, fekk eg auge på ei øy som såg ut som den perfekte leirplass! Eg ringte til pappa som er ganske kjent her ute, og han stadfesta at dette var ei betre øy å slå opp telt på enn den eg hadde sett meg ut på førehand. Teltet er slått opp, og under kan de sjå utsikta mi. No skal eg lage meg risotto med bacon og vårløk.

Har gått i land litt utanfor Syltøy for å ete litt. På menyen står det nudelsuppe og polarbrød med nugatti. Fekk ei skikkeleg vind- og regnbyge i 1430-tida. Padla ei god stund i kraftig motvind og regn. No har det letta att, men det var godt å krype inn i Jervenduken.

Sit og et min tradisjonelle tur frukost: Havregraut. Har fått ei god natts søvn, og er særs fornøgd med det nye teltet. Har bestemt meg for å gå sørover på utsida av Sotra i dag, og satsar på leir på Tekslo i kveld. Det vert nok regn i dag, så pakkar regnkleda lett tilgjengeleg.

La i veg fredag kveld etter ein lang dag på jobb. Padla i eitt, men det vart for fort mørkt til at eg nådde målet om å kome heilt ut til havet. No ventar eg på at betasuppen skal verte ferdig. I morgon bestemmer eg meg om eg reiser nordover i Øygarden eller sørover langs Sotra.

Nydeleg tur på sjøen i dag! I staden for å gå til Brandasund som planlagd, gjekk vi til Bekkjarvik i Austevoll og møtte nokre vener av familien som var der med seglbåten sin. Der åt vi softis og kosa oss. No skal pappa lage pizza!

GPS-loggen frå turen finn du her (krevjar Google Earth).